السلام عليكم ورحمة الله وبركاته..

 في البداية أبارك لكم بداية الدراسة.. والله يجعلها سنة دراسية موفقة للجميع..



-------------------------------------------------------



نرجع لموضوعنا..

أنا قلت لكم تحدي صح؟ إيه عندي تحدي وبنشوف مين يقدر عليه..

شفت في واحد من المنتديات تحدي ومرة أعجبني.. فقلت خلونا نسوي مثله.. ونشوف قد ايش هممنا وصبرنا..

التحدي مررررررة سهل بس يبيله مجاهدة للنفس وشوية صبر..


------------------------------------------------------



.....التحدي.....



 كم مدة التحدي؟

تحدينا يستمر لمدة عشرة أيام..



 طيب ايش فكرة التحدي؟

فكرتنا هي اننا نختم القرآن في عشرة أيام.. بمعدل ثلاثة أجزاء يومياً.. واليوم نبي نبدأ نحسبه من بعد الفجر إلى فجر اليوم الثاني.. وللي ما أمداه هذاك اليوم ممكن يستمر حتى أذان ظهر اليوم الثاني..

وممكن توزعين قراءتك زي ماتحبين.. ولكن أقترح عليكم مثلاً يكون بعد كل صلاة حزب (يعني بس ربع ساعة بعد كل صلاة!!) وبكذا تكوني خلصتي جزئين ونص والنص الباقي اقرأيه مثلاً قبل النوم أو مع أي حزب ثاني.. وكمان بعد صلاة الفجر عندنا وقت ضائع.. مايمدي الواحد ينام فيه وبنفس الوقت ما استغليناه في شيء.. مجرد نتسدح على فرشنا بدون فايدة لا احنا اللي نايمين ولا احنا اللي جالسين نسوي شيء بس نطقها من هالهواجيس.. فممكن بعد الفجر نقرأ الين ما يجي وقت الجامعة أو المدرسه.. وممكن في السيارة أو الباص.. يعني عندنا أوقات كثيرة ممكن نستغلها..



 ممكن أقرأ أكثر من 3 أجزاء أو أقل؟

لو في يوم صارت لك ظروف وما قدرتي تقرين 3 أجزاء مو مشكلة ردي واكتبي كم قريتي حتى لو صفحة وحدة.. وحاولي تعوضين في الايام اللي بعده..

وإذا قدرتي تقرين أكثر من 3 أجزاء.. وختمتي قبل الوقت لك نقطه.. يعني كل يوم حاولي تقرين قد ماتقدرين.. ولو خلصتي قبل الوقت.. ابدأي من جديد يمكن تكملين ختمة ثانية..






 وكيف طريقة التحدي؟

أول شيء اللي تبي تشارك معانا تسجل اسمها هنا.. ولو وحدة مادرت الا متأخرة وودها تشارك بعد مابدينا ممكن تشارك وتشد حيلها تحاول تعوض اللي فاتها..

بعدين كل يوم تدخلين وتكتبين (تم * جزء ليوم ........) يعني مثلاً (تم 3 أجزاء ليوم الإربعاء).. ولو ما امداك تدخلين النت هذاك اليوم ممكن تكتبين الرد في اليوم اللي بعده يعني ممكن تكتبين (تم 3 أجزاء ليوم الاربعاء + 4 أجزاء ليوم الخميس)..

وراح نحتسب نقاط بحيث ان اللي تختم لها نجمة واللي تختم قبل الوقت لها نجمتين..



 ايش الهدف من التحدي؟

هدفنا اننا نجتمع على خير.. ونشوف انه فيه عندنا طاقات كثيرة ماندري عنها.. ولا تقولون مانقدر..  اللي أقولكم عنه في ناس ما شاء الله ختموا في ثلاث ايام وناس في أسبوع وفيه وحدة بدت بداية حلوة بعدين صارت ما تقرا كل يوم الا جزء أو جزء ونص ولما جا آخر يوم قرت 21 جزء ما شاء الله وختمت في نفس الوقت..

يعني الانسان يقدر يسوي لكنه يتقاعس دايما عن فعل الخير..

وايضا خلونا نختم اجازتنا بعمل صالح.. ونبدأ دراستناودواماتنا بعمل صالح.. وندرب انفسنا قبل رمضان لانه قرب..



كلمة أخيرة:

لا تنسون تخلصون نيتكم.. لأن أهم شيء في العمل الإخلاص.. ولا تقولون ما نقدر.. جربي وبتشوفين النتائج..


--------------------------------------------

 

يله هل من مشمر؟